Karjalas jatktase “Venäman vezi” -ühthižvenälaine akcii
Jogahižel vodel Karjala ühtneb “Venäman vezi” -ühthižvenälaižehe akcijaha — veziuitoiden randoiden puhtastusehe. Azjtegod mülüba “Ekologine hüvä elo” -projektaha i abutaba kaita meiden valdkundan veziuitoid. Täl voz’aigal Karjalas planuitas tehta enamba 100 tauguhud, siš tedotadas Karjalan londusen varoiden da ekologijan ministerstvan press-službas.
Tähäsai mäni jo 43 azjtegod, miččihe kaiked ühtni 885 ristitud. Niiden aigan oli keratud 67 kubometrad murdod da puhtastadud enamba 29 kilometrad jogiden i järviden randpirdad.
— Spasib kaikuččele, ken ühtneb tauguhuihe da paneb ičeze vägid meiden valdkundan puhthudehe! Ühtes mö tegem Karjalad völ čomembaks! Ku tahtoit ühtneda mugoižihe azjtegoihe, ka ližatedoid voit sada akcijan valitud rajonan administracijas, sanui Janina Svidskaja, Karjalan Valdmehišton varapäministr i londusen varoiden da ekologijan ministr.
Ezinikoiden keskes om Änižröunan rajon: sigä mäni jo 8 tauguhud, miččihe ühtni 495 volont’orad. Oli keratud 30 kubometrad murdod, puhtastadud 10 km kilometrad randpirdad — tahoil pidust’ Šuja- i Derev’anka -jogid da Änižjärved.
Tarkištele "Oma Median" MAX-kanalad!
