“Karjalan videnik”: uz’ üks’päiväine avtomatk Petroskoišpäi
Nügüd’ Karjalan turistkeskuses vaumištadas “Karjalan videnik” -üks’päiväine avtomatk. Se kožub ristituile, ked tahtoiba nägištada meiden regionan kaikid čomembid da popul’arižembid melentartuisijoid ühtes päiväs. Siš tedotab Karjalan Valdkundan ekonomižen kehitoitusen ministerstvan press-služb.
“Karjalan videnik” -avtomatk zavodiše Petroskoiš i mäneb regionan kaikid popul’arižembiden melentartuisijoiden kal’t. Neniden keskez om Jänišiden tasangišt — ičeladuine art-sija: kal’l’os “eläb” enamba tuhad jänišad, miččidenke voib fotografiruidas kaikutte tahtnik. Mugažo avtomatkan aigan turistad oleskeleba Sampo-mägel, kus om čoma kacundtandreh i kus om unikaline energii (sijaližiden starinoiden mödhe).
Sen ližaks avtomatknikad tundistasoiš vanhanke “Marcialižed veded” -lebukeskusenke, miččen augonpanend oli P’otran I käskön mödhe, Girvas-lämoimägenke, kus voib nägištada jähtunuzid lämoilaskman valuid, da tetabanke Kivač-vezilanktusenke, mitte tegese parahimaks matkan lopuks.
— Nece avtomakt om meletadud muga, miše turist ehtiži nägištada kaikid popul’arižembid melentartuisijoid kiruhuta da stressata. Avtomatk kožub kut ühtele ristitule, muga ristituiden joukule-ki, kogonaižele kanzale, sanutas Karjalan ekonomižen kehitoitusen ministerstvan press-relizas.
Avtomatk tehtas “Turizm da adivoičetand” -valdkundaližen projektan aigan, miše tehta matkad Karjaladme völ kebnembikš valdkundan adivoiden täht.
Uzištoid neciš temas voib lugeda mugažo karjalaks da suomeks.
Liity Oma Median MAX-kanavalle!
