Karjalan taidehmuzejas avaitihe kul’turkeskuz lapsiden täht
Petroskoiš Karjalan taidehmuzejas avaitihe Lapsiden kul’turkeskuz, mitte oli tehtud “Pereh” -valdkundaližen projektan aigan, siš tedotab Karjalan kul’turministerstvan press-služb. Uz’ keskuz om nügüd’aigaine sija lapsiden da noriden intellektualižen kehitoitusen i sädandan täht.
Ühtnend valdkundaližehe projektaha andoi muzejale voimusen ostta nügüdläšt kaludištod, miše todenzoitta openduz- da kul’turprogrammoid: fodo- i videotehnikad, tedomašinoid, kaludištod mul’tfil’moiden tegendan täht da äi tošt. Nügüd’ keskuses jo voib tehta mul’tfil’moid, pirta komiksoid taidehstudijas da rata fotostudijas.
— Noril keskusen kävujil om voimuz todenzoitta eloho erazvuiččid sädandprojektoid, kosketadas i tundištadas toine toiženke. Keskusen avaiduz abutab Taidehmuzejale enamba voimusid rada lapsidenke da noridenke, tehta azjtegoid kogonaižele perehele. Nece om tärged azj Karjalan Valdkundan kul’turümbrišton kehitoitusen täht, sanutas press-relizas.
Ühtneda keskusen ezmäižihe kul’tur- da openduzprogrammoihe voib jo voden 2026 kezakus.
Uzištoid neciš temas voib lugeda mugažo karjalaks da suomeks.
Tarkištele "Oma Median" MAX-kanalad!
