Viime netälin lopušša Karjalan Rahvahan liiton johtokunta ta jäšenet keräyvyttih, jotta keškuššella ta pityä avoiäneštämini kahešta muutokšešta. Enšimmäini muutoš koški kanšalaisjärješšön peruškirjua: piti šelittyä pykälä luvašta viettyä kauppatoimintua. Toisena kyšymykšenä oli piättyä, ket jatketah ruatua Karjalan piämiehen rinnalla toimijan karjalaisien, šuomelaisien ta vepšäläisien etuštajien neuvošton jäšeninä šekä kuunnella KRL:n kahen projektin toteuttamisen tulokšista ta šuunnitelmista.
— Kokoukšen jäšenet myönteisešti iäneššettih peruškirjan kauppatoiminnan luvan šelittämiseštä. Niise iäneššettih šiitä, jotta Karjalan Rahvahan liitolta Karjalan piämiehen rinnalla toimijah karjalaisien, šuomelaisien ta vepšäläisien etuštajien neuvoštoh rupieu kuulumah entiset jäšenet: Viktor Bogdanov, Tatjana Klejerova, Natalja Sinitskaja ta Tatjana Izotova, šano Karjalan Rahvahan liiton johtaja Anna Jakovleva.
Šen jälkeh oli esitetty Opaššumma yheššä -projektin tulokšet. Šen johtaja Valentina Mironova kerto mitä oli ruattu projektin aikana, mimmoista jatkuo še voipi šuaha ta mitein käyttyä projektin toiminnan tuottehie.
Anna Jakovleva kerto Karjalaini etnoklasteri -projektista, kumpani ruvetah toteuttamah enši vuotena.
Lopušša oli pietty pruasniekka Uuvvekši vuuvvekši. Kanšalaisjärješšön jäšenet laulettih ta tanšittih Kajahuš- ta Karjala -yhtyvehien kera, juotih čäijyö ta ošallissuttih arpajaisih.