Musiikki-Karjala -projektin rajoissa valmissetah 20 videota, kumpasih ošallissutah meijän tašavallan omatoimiset lauluryhmät. Enšimmäistä videota jo šuau kaččuo internetissä. Laulumarafonin alotti Karjalan vanhin yhtyveh – Puudožin kanšankuoro.
– Projekti toteuttuu Karjalan 100-vuotisjuhlan rajoissa. Myö tahomma kertuo lauluryhmistä, kuoroloista, šoittoyhtyvehistä, tanšširyhmistä videojen avulla. Kyllä, Petroskoissa on äijän hyvie ryhmie, ka meijän tarkotukšena oli ottua projektih luovie kollektiivija juuri piirilöistä, kerto Tatjana Ledn’ova, Musiikki-Karjala -projektin johtaja.
Kaikkieštah projektin aikana kuvaukšie pietäh Karjalan pohjois- ta šuviošan11 piirissä. Šen lisäkši 50 musiikkikappalehta tallennetah studijošša.
Musiikki-Karjala -projektin avulla Karjalan eläjät šuahah mahollisuon lähemmäkši tuttavuštuo ainutluatuseh musiikki-, laulu- ta tanššikulttuurih, kummaista šäilytetäh meijän tašavallan piirilöissä.