Vuuvven lopušša Artur Parfenčikov hyvitteli Karjalan vuuvven palkinnon šuajie. 15 ihmistä, kumpasien ruato tänä vuotena oli merkitty keräyty juhlalliseh seremonijah Karjalan kanšalliseh musejoh.
— Vuuvven lopušša myö aina kaččelemma, mitä oli ruattu tašavallašša, ajattelemma tulokšie. Kaikkien tulokšien šuamisešša keškipaikalla on ihmisie. Joka ihmisen ruato on tärkie. Hyö luuvvah oman kotipaikan, kaupunkin, alovehen, muan istorijua. Kuin pieni puro virtuau šuureh jokeh, niin joka ihmisen panoš on tärkie yhtehiseššä šuurešša ruavošša, šano Artur Parfenčikov.
Palkinnon šuajien kešen on ihmisie, kumpaset tänä vuotena puoluššetah meijän muan iččenäisyttä šekä tašavallan tevollisuš-, muatalouš-, tervehyš-, tieto- , kultuuri- , urheilu- , sosiaalialan ammattilaisie.
Vuuvven parahakši ihmisekši oli šanottu Venäjän Šankari, everstiluutnantti, lentäjä Ilja Sizov. Seremonijašša oltih hänen vanhemmat Andrei ta Ol’ga Sizovit. Hyö kiitettih palkinnošta ta kerrottih, kuin poikah valičči ammatin.
Toimenpivošša voipi tiijuštua äijän faktoja palkinnon šuajien ammatiloista ta elämäštä.
Yksi palkinnonšuajašta on Petroskoin musiikkiopiston opaštaja Tamara Mazurkevič. Hiän opaštau laulamah. Hänen opaštujat šuahah korkeita palkintoja Venäjän festivaliloissa. Tamara Aleksandrovna korošti ceremonijašša, jotta hiän on karjalaisešta pereheštä šyntysin ta on oikein kiitollini vanhemmilla šiitä, jotta karjalaini kulttuuri šäily pereheššä.
Vielä yksi Karjalan kanšan vanha perinneh oli koroššettu — pomorien kultasella lankalla merkkauš. Vanhan käsityön šäilyttämiseštä oli palkittu Pomorjen kultani lanka -yhteisön johtaja Natalja Lisenkova.
A nuorempana Vuuvven laureattina on Sergei Piščenko. 13-vuotini poika pelašti uppuojan yštävän järveššä kylpömisen aikana.
Seremonijašša Artur Parfenčikon pani merkillä, jotta hakemukšien luvušta on oikein vaikie valita 15 parašta ihmistä ta tulijiksi vuosiksi laureattien miärä ruvetah lisyämäh.