“Karjalan nored modod”: valdkund tundeb ičeze lahjakast norištod!
Petroskoiš om jo azotadud bannerad da ekranad, miččil ozutadas parahimad erazvuiččiden alovehiden nored specialistad. Nece tehtas “ Karjalan nored modod” -projektan aigan: valdkundan eläjid tundištoittas lahjakahidenke noridenke mehidenke — lekaridenke, opendajidenke, inženeroidenke, IT-specialistoidenke, sportmehidenke, kul’turradnikoidenke, volont’oroidenke, biznesmehidenke da toižiden eloradoiden ezitajidenke.
Karjalan Pämehen press-služb tedotab, miše 30. sügüz’kud zavodiše toine pakičusiden otand. Ühtneda projektaha voib 14—35-vozne Venäman rahvahanik, kudamb eläb Karjalan Valdkundas da kudambal om surid sabustusid ičeze professijas vai kundaližes rados. Tarita kadidatan voib kut ristit, muga organizacii-ki.
— Kandidatoid valičeb specialine konkursan laudkund. Se arvosteleb ühtnikan professionaližid da kundaližid sabustusid, hänen panendad ičeze alovehen kehitoitandaha, radmahtištod da sen znamoičendad, hänen ezinikpirdoid, ristituiden tuged, popul’arižut da äi tošt, sanutas press-relizas.
Projektan vägestajad saba voimusen starinoita ičeze polhe erazvuiččiden joukvestišton abul. Heiden täht tehtas professionaližed foto- i videosjomkad, heiden fotokuvad ozutadas Karjalan lidnoiš irdbanneroil, internetas da ozutelusel Petroskoin Norišton pertiš, a mugažo sirdändozutelusel, mitte ozutadas valdkundan erazvuiččiš rajonoiš.
“Karjalan nored modod” -projektan todenzoittas “Region noriden täht” -programman aigan, sen tegii om Karjalan regionaline Norišton keskuz. Necidä tugedab Karjalan norišton politikan ohjanduz. Projektan pätegend om tundištoitta valdkundan ristituid norenke sugupol’venke da sen parahimiden specialistoidenke — starinoita niiš, ked kehitoitaba Karjalad.
Tarkištele "Oma Median" MAX-kanalad!
