Karjalan kyykkä-joukko on yksi Venäjän parahista
Karjalan kyykkä-peluajat hyvin esiinnyttih Venäjän kilpailuissa, kumpaset piettih Čerepovetsissa. Kilpailuh otti ošua Karjalan joukko nel’l’a – naista: Žanna Tikkanen, Natalja Žulai, Jelena Kirjanen ta Natalja Petrova. Karjalan miešjoukkuo ei ollun, ka miehet Andrei Petrov ta Eduard Kirjanen kilpailtih yksityiskilpailušša.
Naisien yksityiskilpailuissa Žanna Tikkanen piäsi toisella paikalla, Natalja Petrova ta Jelena Kirjanen oltih kahekšan parahan peluajan joukošša.
Miehien yksityiskilpailušša Eduard Kirjanen piäsi kahekšan parahan pelujan joukkoh.
Joukkokilpailušša Karjalan naisjoukko (Žanna Tikkanen ta Natalja Žulai) piäštih toisella paikalla.
– Näissä kilpailuissa niise myönnettih urheiluluokkie. Kirjanen Eduard ta mie – Tikkanen Žanna šaima Urheilumestarin kandidatti -arvonimet ta Kirjanen Jelena, Natalja Petrova ta Andrei Petrov šuatih enšimmäisen urheiluluokan. Nyt Karjalan joukkuo vuotetah kilpailuh Moskovah. Muajilman meštaruškilpailuja pandemijan takie ei järješšetä. Toivomma, jotta kyykkä-kilpailuja perintehellisešti pietäh Karjalaššaki šyyškuušša. Valmistauvumma nyt niih, šano hopien palkinnonvoittaja Žanna Tikkanen.
Kyykkä-peli virallisešti on pualikkapelin lajina, šentäh šitä pelatah meštaruškilpailujen eri tašoilla.
