Karjalan kodi-internuatat kohendetah
Lähes 190 miljounua rubl’ua annetah Petroskoin, Videlen da Kentjärven sotsiualualan laitoksien kohendamizeh. Federualline keskus hyväksyi Karjalan piämiehen kehoituksen andua ližiä varua kodi-internuatoin perustehellizeh kohendamizeh. Karjal suau valdivon b’udžietaspäi 189 miljounua rubl’ua kanzallizen Pereh-projektan mugah.
Videlen vahnoin kois kohendetah eländypertit. Ruavot alletah vuvvennu 2026.
Tulien vuon federualukeskuksespäi suaduloih varoih uvvistetah tulipalosistiemu Petroskoin veteruanoin kois da vienpuhtastussistiemu Kentjärven psihonevrolougizes internuatas.
— Ruaduo jatkammo: Karjalan rezervufondaspäi annoimmo varua Ladvan da Karhumäin internuatoin perustehellizen remontan dokumentoin valmistamizeh. Kerras, konzu net roitah valmehet, työnämmö uvven subsiidien pakičuksen Ven’an Ruadoministerstvah, kirjutti Artur Parfenčikov omassah VK-sivul.
Mennyön vuvven pakkaskuus Karjalan sotsiualupuolistuksen ministerstvu työndi Ven’an ruado- da sotsiualupuolistuksen ministerstvah pakičukset da kyzyi ližätä varua kolmen sotsiualualan laitoksen perustehellizeh remontah. Ven’an ruado- da sotsiualupuolistuksen ministerstvu hyväksyi net.
Aihies voit lugie suomeksegi.
