Karjalan ezinikad – 2021: superfinalaha putui 16 parahimad projektad
Kaiked ”Karjalan ezinikad – 2021”-konkursaha ühtni 127 mest, niišpäi finalaha putui 39. Ühtnikoile pidi kirjutada projektoid i ezitada niid. Superfinalaha putui 16 mest, kelle pidab voibišteldas superfinalas. Superfinalistoiden keskes om vepsläine aktivist Anna Anhimova, kudamb eziti ičeze projektan ”Etnokeitimpol’ ”Luzik”
— Minä olen superfinalas. Olen ozakaz, miše projektan idei rahvahaližen keitimpolen polhe oli muga korktas arvostadud. Kitän ičein ohjandajad Ol’ga Sizovad ühthižrados i siš, miše hän abutab toda ezile necidä temad meiden armhas Karjalas. Uskon, miše nece linneb uz’ mahtišt i kacund tradicijoihe, todesižiden sömižiden kaičendaha da kehitoitandaha, sanub ”Kiži”-muzejan radnik Anna Anhimova.
Nügüd’ konkursan ühtnikad vaumičesoiš superfinalaks. Heile pidab polestada ičeze projektoid konkursan ohjandajiden edes, kudambid valičeba ekspertad da valdmehišton ezitajad. Superfinalas vasttasoiš kaik ühtnikad, heil linneb voimuz tehta küzundoid toine toižele. Parahimiš projektoiš ühtnikad saškaba nevondtugen, voimusen paremboitta ičeze projektoid.
