Karjalan eläjad ühtneba “Abilimpiks”-čempionatha
Täl vodel 200 Karjalan eläjad ühtneba “Abilimpiks”-čempionatan regionaližehe etapaha, mitte mäneb keväz’kun 30. päiväspäi sulakun 3. päivähasai, tedotadas Karjalan tedotusen da sportan ministerstvan press-službas.
“Abilimpiks” om professionaližen mastaruden čempionat, mitte tehtas invalidoiden da mugoižiden ristituiden täht, kudambil om tervhuden röunatadud voimused. Ičeze mahtoid ozutab školopenikoid, üläopenikoid da specialistoid 34 nominacijas: “Kebnenzoitud likundan instruktor”, “Avtomobiliden kohenduz da holituz”, “Keitimpolen radnik”, “Tervhuz’holituz da socialine abu”, “Kormtehnikan holituz”, “Lazertehnologijad” da toižiš.
Žürijouk 120 ekspertaspäi valičeb parahimid professionaloid. Čempionatal ühtnikoile abutab 100 volont’orad.
— Mugažo “Abilimpiksan” aigan tehtas Professijoidenke tundištoitusen festival’, mitte om oigetud 5–14 voččile lapsile. Nored ühtnikad ozutaba ičeze sädandmahtoid pajatandas, vändandas muzikvändimil, literaturas da toižiš alovehiš, tedotadas Ministerstvan press-službas.
Professionaližen mastaruden čempionatan ližaks ühtnikoiden täht om vaumištadud kul’tur- da sportprogrammad, ozutelused da eloradon valičendan azjtegod, miččiden aigan mäneba mastar’klassad, seminarad, vastused radonantajidenke, kebnenzoitud likundan festival’, professijoiden jarmark da äi tošt.
“Abilimpiks” -rahvahaline projekt kehitoittas “Professionalitet” -federaližen projektan aigan — nece kaik mülüb “Norišt da lapsed” -valdkundaližehe projektaha. Jo 12 vot “Abilimpiks”-čempionat abutab norištole tehtas rohtembikš ičeze vägiš, löuta hüvän professijan da kehitoitta ičeze mahtoid.
Sada tarktembad tedod Karjalan “Abilimpiks”-čempionatas voib projektan oficialižel VKontakte-lehtpolel.
Uzištoid neciš temas voib lugeda mugažo karjalaks da suomeks.
Tarkištele "Oma Median" Telegram-kanalad!
