Karjalan 11 školmuzejad voibištelese ühtižvenälaižes konkursas
Karjalan Valdkund ühtneb školmuzejiden konkursas, miččen sädab “Znanije”-sebr (“Tedo”). Kut tedotab sebran press-služb, kaiked žürijouk sai enamba nelläd tuhad pakičust erazvuiččiš Venäman regionoišpäi — Karjalaspäi oli oigetud 11 pakičust.
Enamba kaiked pakičusid Karjalaspäi oli oigetud kahtes nominacijas: “Parahim Kodiman kaičijoiden muštole omištadud ekspozicii” da “Parahim istorijaline ozuteluz”. Ozutesikš, Rugozeron školan kodirandmuzejas kaitas enamba kaht tuhad eksponatad: karjalaižiden tradicionaližen elon kaluid, azjbumagoid, personaližid kaluid da ecindjoukuiden löudusid. Ekspozicijad starinoičeba amuižes Rugozero-küläs, školan pit’kas istorijas, “Vper’od”-partizanjoukus (“Edehe”), Suren Voinan da specialižen voinoperacijan gerojiš.
Konkursal Ladvan keskškol №4 ozutab ekspozicijan, mitte om omištadud taidehpirdajale Tamara Jufale. Ezile om pandud 43 kirjad hänen kuvidenke, “L’aguška-Carevna”-kuva da fotod pereharhivaspäi.
— Školmuzejiden konkurs ozuti sur’t melentartust patriotizman da kul’turjäl’gestusen temoihe. Konkursan ühtnikoid ühtenzoitab sur’ tegend — kaita da antta tulijoile sugupol’vile meiden man arvokast istorijad da kul’turjäl’gestust, sanui “Znanije”-sebran varapämez’ Kirill Hvil’.
Nügüd’ školmuzejad kävutoitaba digitaližid formatoid: virtualižid ekskursijoid, fondoiden elektronižid katalogoid, ekspedicijoiden interaktivižid kartoid i m. e. Äjiš školmuzejiš openikoiden täht vedetas erazvuiččid azjtegoid, miččed om omištadud specialižele voinoperacijale.
Uden konkursan aigan om jo tehtud läz tuha azjtegod: ekskursijoid, intellektualižid voibištelendoid, lekcijoid. Praznikaline pauklahjoičendan ceremonii pidetas Moskvas redukus “Pam’at’ živa” -forumal (“Mušt eläb”).
Školmuzejiden konkurs oli sätud Venäman Tedotelendministerstvan tugel Vladimir Putinan käskön mödhe.
Uzištoid neciš temas voib lugeda mugažo karjalaks da suomeks.
Tarkištele "Oma Median" MAX-kanalad!
