Karjala valmistautuu matkailun kešäkauteh
Kuin Karjala valmistautu kešäkauteh kerto Karjalan hallitukšen piäministerin šijahini taloušalalla Dmitrii Rodionov. Oli käsitelty kuletukšen, hotellien šekä infrastruktuurin valmistelu.
— Šuurin oša matkuštajie tulou Karjalah junalla tahi autolla. Petroskoin, Sortavalan, Kemin, Belomorskin ašemat šekä Petroskoin lentoašema ta laituri ollah valmehet turistikauteh. Koko Karjalašša valmissettih yli 1000 paikkua hotelliloissa, korošti Dmitrii Rodionov.
Šuurimpien nähtävykšien valmissuš on loppušuoralla. Kiži-musejo ošti uuvven laivan, kumpasella ruvetah kulettamah 50 turistie šuarella. Ruskealašša avatah istorija-kulttuurikeškuš. Belomorskin kallivopiirokšien viereššä ašennetah pihalamppuja, korjatah tie ta kunnoššetah paikkua. Sampo-vuaralla oraškuuh šuaten lopetetah kunnoštamistöitä, šielä tulou turvallisemmakši ta mukavammakši.
Viime vuotena Karjalah tuli 1,3 miljonie turistie. Tänä vuotena vuotetah vielä enemmän ihmisie.
