Karjala om “Vrem’a Zavtra” -projektan ezmäine ühtnik
Karjala tegihe ezmäižeks Venäman regionaks, miččes om zavodinu ičeze radon “Vrem’a Zavtra” -socialine projekt. Se om oigetud eriližen voinoperacijan veteranoiden socialižehe harjenemižehe. Karjalas niile, ked spravitoitase Petroskoin Veteranoiden gospitališ, om tehtud erazvuiččid openduzkursid, miše veteranad voižiba sada uzid professionaližid mahtoid. Siš tedotadas “Respublika”-portalal.
Opendusen pätemad oma rad ičelendajiden ladehidenke, digitaližiden fotoiden tegemine tarkištelendan da arhiviruindan täht, a mugažo tegointellektan kävutoitand, miše paremba rata tedoidenke. Ned temad om sidotud ajamiden kehitoitandaha. Mugoine programm ühten aigan pätab äjak-se surid problemoid: se andab veteranoile voimusen spravitoitas ilma keskustata da sada psihologišt tuged, andab arvokahid praktikaližid mahtoid, miččid kävutoittas meiden man ajamiden poles. Mugažo nece programm tegeb üks’hengiden sebran, mitte abutab veteranoile hätkemba pörtas ühthižkundaha.
— Meiden projekt om ühthižvenälaine, i se om zavodinus Karjalas. Toivom, miše projektan ühtnikad jagase meidenke ičeze tundmusil. Jo tämbei hö tartuba praktikaližihe urokoihe ani nügüd’aigaižil predmetoil — digitaližiden fotoiden tegemižel, radol ičelendajiden ladehidenke da tedointellektanke. Meiden partn’orad oma Ičelendajiden sistemoiden federaline keskuz Piterišpäi, Venäman rahvahaližen elomišton da valdkundaližen radon akademii. Mö tahtoim, miše veteranad, kudambad harjeneba kožmuzeloho, saižiba tedoid da mahtoid tulijan radon täht vai zavodižiba ičeze biznesad. Tahtoin spasiboita Karjalan valdmehištod da Artur Parfenčikovad. Karjala om tehnus meiden projektan esmäižeks ühtnikaks, — sanui Ol’ga Vorošilova, “Vrem’a Zavtra” -projektan pämez’.
Eriližen voinoperaicijan veteranoiden openduz planuitas tehta 13.—26. redukud Petroskoiš. Sihe voib ühtneda ei enamba 19 veteranad, kudambil om tugedamiž-likundan sisteman problemoid.
Uzištoid neciš temas voib lugeda mugažo karjalaks da suomeks.
