Karjalan hallituš kerto koulujen rakkenukšien korjaukšen tulokšista ta šuunnitelmista. Petroskoissa ta Karjalan piirilöissä federalisen ohjelman mukah oli alettu peruškorjauš 18 keškikoulussa. Nelläššä koulušša še oli lopetettu, toisissa jatkuu tänä vuotena. Peruškorjaušohjelman luvetteloh lisättih vielä 29 kouluo.
Šuurimpina korjauš- ta rakennušprojektiloista on Šujun koulun korjauš ta Karhumäješšä koulun rakentamini. Vuuvven alušša molommašša paikašša kävi Karjalan piämieš ta tarkisti mitein korjauš mänöy.
₋ Vuuvven 2024 1. šyyškuuta Karhumäjen lapšet lähetäh uuteh kouluh. Še on šuuri rakennuš, kumpasešša luokkahuonehien lisäkši on urheilusalija, musejo, ruokala, tanššisali ta pruasniekkasali, šano Artur Parfenčikov omalla šivulla Vkontakte-verkošša.
Šujun koulušša šuoritetah šuurinta korjaušta. Koulušša on jo luajittu katto ta lopetah oččašeinien korjaušta. Korjaukšen lisäkši koulušša uuvvissetah huonekaluja ta opaššušvaruštehie.
Koulujen peruškorjaukšen ohjelman rajoissa täkši vuuvvekši Karjala šai kakši miljardie rupl’ua. Šen lisäkši tašavalta käyttäy 300 miljonie omie varoja.