Kanzalline poliitiekku: yhteiskunnallizien liittoloin kehoituksii kägiettih kuulta
Karjalan piämiehen tyves toimii karjalazien, vepsäläzien da suomelazien edustajien nevvosto pidi omassah jälgimäzen istundon tänä vuon. Paginal oldih valdivollizen kanzallizen poliitiekan realizatsii, karjalazien valattamizen 800-päiväle omistetut pivot da pluanat tuliekse 2026 vuvvekse.
Vepsäläzien kandurahvahannu suadavis varois da niilöin piendäs saneli Kanzallizen da alovehellizen poliitiekan ministerstvan puoles Jelena Migunova.
— Vuvvennu 2025 vepsäläzet suadih federuallizes keskuksespäi 1 miljounu rubl’ua. Tulien vuon se summu kazvau 76 tuhandel rubl’ua. Nämmä den’gat käytetäh vepsäläzis kylis piettävih pruazniekkoih, Kalagen kylän obščina-yhtevyksen kehittämizeh, sego toizen kerran painetutetah Sanu, luge, kirjuta -opastuskogomus, sanoi nevvoston istundos Jelena Migunova.
Federuallizet varat, kuduat annetah Ven’an kanvoin yhtenäzyön lujoittamizeh da etnokul’tuurizeh kehittämizeh sezo suuretah tulien vuoh: vuvvennu 2025 niidy oli 16 miljounua, vuvvennu 2026 rodieu lähes 25 miljounua rubl’ua.
Nevvostolazet kyzyttih, kuulougo ministerstvu Kanzallizuksien azieloin federuallizeh keskukseh zajavkua kirjuttajes kanzallizien liittoloin kehoituksii da tarbehii. Ministerstvu nevvoi kiändyö heijän puoleh kirjallizesti, Periodika-julguamo, kudai ministerstvan kauti suau nämmä varat da käyttäy niilöi, uskaldi ottua kai yhteiskunnallizien liittoloin kehoitukset ruadoh.
Karjalazien valattamizen 800-vuozipäiväle omistettulois tapahtumis kerdoi Kul’tuuran ministru Aleksei Lesonen:
— Vuvvennu 2025 nämmih pidoloih oli suadu 52, 6 miljounua rubl’ua. Nämmil varoil on jullattu pohjaiskirikköobrazoin katalougu, allettu dokumentufil’man kuvuamine pravosluavien histouries Karjalas da Kaivospiälikön koin kohendamisruavot, kuduas remontan jälles avatah Pravosluavien muzei. Paiči sidä on allettu Kurkijoven muzein kohendusruavot da ozutteluloin luadimine.
Kanzallizen da alovehellizen ministerstvan luajittu tulien vuvven nevvoston ruadopluanu ei miellytännyh nevvostolazii. Heijän mieles paginale pidäy ottua vagavembii da palavembii kyzymyksii. Nevvostolazet kägiettih työndiä ližiä aihiedu nevvoston tulien vuvven ruadoh.
Aihies voit lugie vepsäksegi.
Yhty Oman Median kanualah Telegramas!
