Kanzalline poliitiekku: strateegii kymmenekse vuottu
Ven’an prezidentu Vladimir Putin hyväksyi valdivollizen kanzallizen poliitiekan strateegien vuodessah 2036. Dokumentu miäriy valdivovallan elimien ruaduo da niilöin yhtevytty yhteiskunnallizien kanzallizien järjestölöin kel kanzallizen poliitiekan alal.
— On miärätty valdivollizen kanzallizen poliitiekan piätavoiteh — Ven’an Federatsien monikanzallizen rahvahan yhtevyön da kanzallizen omaničentunnon lujoittamine etnokul’tuuristu da kielellisty moniluaduvuttu säilyttäjes muan valdivollizen da alovehellizen kogonažuon turvuamizekse, se syväinpoliittizen da sotsiuallizen muuttumattomuon hyväkse, kirjuttau Karjalan tazavallan Kanzallizen da alovehellizen poliitiekan ministerstvu omassah VK-sivul.
Erinomastu huomivuo uvves strateegies on kiinnitetty ven’an rahvahan kul’tuuran kehittämizeh da säilyttämizeh. Dokumentas on kirjutettu konkreettizet ruavot ven’an kielen säilyttämizekse da kehittämizekse valdivollizenny kielenny da kanzoinvälizen yhtevyön kielenny.
— Tävvelleh kannatan uvven strateegien ilmoittamistu. Täs dokumentas kuvastutah meijän monikanzallizen muan nygyaigazet reaaliet, se pal’l’astau aktuaalizet probliemat da miäriäy ruavot kanzallizen poliitiekan alal. Strateegien täyttämine andau meijän muale mahton pyzyvästi kehittyö, sanoi Karjalan kanzallizen da alovehellizen poliitiekan ministru Sergei Kisel’ov ministerstvan lehtistöpalvelule.
Kanzallizen poliitiekan uuzi strateegii rodieu voimas vuvven 2026 pakkaskuun 1. päiväs algajes.
Aihies voit lugie vepsäkse da suomekse.
Yhty Oman Median kanualah Telegramas!
