”Kanteletar” Kostamukses: pajuo da tansii
Kostamukses 7.—9. tuhukuudu pietäh perindölline suomelas-ugrilazien rahvahien festivuali ”Kanteletar”. Suuri pido algavui linnan Ystävys-keskukses.
Festivualis ozutetah Päiväzen tytär -spektakli, kuduan perustehennu ollah karjalazet suarnat.
— Kaksi vuottu tagaperin ozutimmo Nasto-spektaklin. Sie paiči ven’ua sai kuulta karjalangi kieldy. Se oli ylen hyvä. Tämän vuvven ozutelmas kuulemmo vaigu ven’ua, sanoi Oma Mediale Viena-seurah kuului karjalan kielen opastai Marija Urbanovič.
Pivon toizennu piän neroniekat Kostamukses, Kalevalas, Vuokkiniemel da Ondärvelpäi taritah ozutettavakse da ostettavakse omii luajilmuksii. Samannu piän 14.00 aigah algavuu ”Kruuga”, kudai on omistettu kostamukselazen Hete-folklourujoukon 40-vuozipäiväkse. Pidoh tulluot suajah tansie da pajattua, kižata da pidiä iluo.
— ”Kantelettaren” aigah ainos opastammo festivualih tulluzii karjalazih tansiloih. Net miellytetäh nuorižuo dai vahnembii. Rubiemmo kandelehelgi soittamah, ližiäy Marija Urbanovič.
Festivualin jälgimäzenny päivänny pietäh kyykkä- kižat da niilöin voittajien palkičendu.
