Kilpailušša oli kakši nominatijuo: lehtiartikkelit ta TV- ta ratijo-ohjelmat. Kilpailuh ošallistu 24 toimittajua, heiltä oli šuatu 48 tevošta.
Kilpailun pitäjät koroššettih, jotta joka ruato erosi toisista omalla ainutluatuisuolla, tevokšešša tuntu luatijan meštaruš.
Enšimmäisellä paikalla piästih Larisa Čirkova ta Jelena Ruppijeva, toisella — Anastasija Šestak ta Margarita Pehkonen ta komannella — Darja Švetsova ta Anna Turkina.
— Miula on kahella kerralla miellyttävämpi šuaha tämän palkan, šentäh kun ratijo-ohjelma oli omissettu Vepšäläisien kulttuurin šeuran pitämällä seminarilla, kumpaseh ošallissuttih vepšän kielen opaštajat. On tärkie, jotta ohjelmašša kuuluu vepšän kielen erilaisie pakinoja ta käsitelläh vepšän kielen opaštamisen proplemoja ta vaikeukšie, šano Karjalan ratijon toimittaja Larisa Čirkova.
Kilpailušša oli valittu vielä kolme tevošta, kumpasien luatijat šuatih Kanšallisen ta alovehellisen politiikan ministerijön erikoislahjoja. Yksi niistä on Tatjana Romanovan Kaksi kul'tuurua - yksi roindumua -artikkeli.
— Milma innoššuttau še, jotta ihmiset tarvitah karjalankielistä lukomista. Aunukšešša eryähät ohikulkijat tullah miun luokše ta kiitetäh miun ruavošta, miun kirjutukšista, šelitti Tatjana Romanova.
Kilpailun pitäjät onnitellah kilpailun ošallistujie ta toivotah, jotta kanšalliskielisie tevokšie tulou vielä enempi.