Karjalan tašavallan piämiehen granttien fondi on uuši valtijollis-kanšalaini järještö. Šen tarkotukšena on noštua mielenkiintuo projektitoimintah tašavallašša, erityisešti šen piirilöissä.
̶ Kanšalaisien järještöjen ieššä on äijän tehtävie. Kyllä, monet niistä ei olla niin šuurie kuin tehtahien tahi laivojen rakentamini. Ka tämä ruato on ylen tärkie ihmisien elämäššä, šen parentamisešša. Meijän aktivistit toičči niin pienellä rahotukšella ošatah alottua šuura toimintua. Heijän aktiivisešta elämäntavašta riiputah muutokšet monella elämän alalla, korošti Artur Parfenčikov.
Issunnošša esiinnyttih eri kanšalaisjärještöjen johtajat, kumpaset toteuvutah projektija sosiaali-, kulttuuri-, hyvänluajinta-, urheilu-, kašvattamisaloilla. Nämä šuunnat kehitytäh kanšalaisjärještöjen ruavon tehtävinä ta šuahah granttikannatušta. Tänä vuotena piämiehen granttien kilpalušša on 15 šuuntua. Järještäjät vuotetah hyvie ta mukavie projektija. Šitä varoin oli pietty seminarien šarja Karjalan piirilöissä ta Petroskoissa. Kilpailun fondissa on juatavakši voittajien kešen šata miljonie rupl’ua.