“Kalevalan hengilöin jälgilöi myöte”
Karjalan lapsienpuolistusliitto todevutti Kul’tuuruinistiatiivoin Prezidentan fondan kannatetun “Kalevalan” hengilöin jälgilöi myöte -projektan.
Projektu kesti pakkaskuus algajen heinykuussah. Sen piälimäzii tarkoituksii on tuttavuttua orboilapsii Kalevala-eppillizeh poeemah da yhtes ruadajes da matkustajes työnnyttiä heidy oigiedu eloksen dorogua myöte astumah.
Karjalan lapsienpuolistusliitto ruadau Petroskoin, Puudogan, Kondupohjan, Segežan da Sordavalan lapsien abukeskuksienke, kudamis elejät arboilapset. Puolen vuvven aloh lapset abukeskuksis tuttavuttih “Kalevalah” metoudiekan mugah: lapset kačottih fil’moi, lugiettih, luajittih pienii spektakliloi. Sit heinykuus projektan jälgemäzekse pivokse rodih seiččemen päivän matku Oniegas ymbäri olijoi linnoi myöte. Matkah yhtyi 14 lastu, nuorembal oli 11 vuottu igiä.
— Myö olimmo Karhumäis, Puudogas, Šal’skii-kyläs, Hirvakses, Valgei mägi, Sampo-mägi -kohtis, Sandarmohas, Čolmužis kačoimmo kirikkyö, kačoimmo Onieganrannikon kallivopiirustuksii. Joga kohtas myö ečimmö midätahto yhtehisty Kalevala-eepoksenke, šeikuičimmo, verdailimmo, sanoi Karjalan lapsienpuolistusliiton ruadai, Trajektorija uspeha -programmas vastuaju Faina Kondratjeva.
Eri projektoin vuoh lapsienpuolistusliitto enzivuoroh suau orboilapsii ruadamah midätahto hyviä, työnnyttäy eloksen oigiele dorogale, opastau oigieloih ristikanzoin suhtehih.
— Projektah yhtynyzien lapsien joukos oli brihačču, kudai ei paissuh nikenenke. Ga puolen vuvven peräs häi yksinäh nouzi lavale da rubei pagizemah. Se on hyvä tulos. Matkas olles lapset opastutah erähih perusnerolois, kui midä pidäy ruadua. Ezimerkikse, ei kaikin tietty, kui pidäy käyttiä sprejua tihilöi vastah, pidi kai ozuttua. Eräs brihačču syömisty varustamas sordi leikkavusluadazen, pöllästyi, kaččou minuh. Kyzyy: “Mindäh et kirru, et čakkua?” Minä sanon: “Miksebo pidäy čakata, sorrit da peze”, sanelou Faina.
Matkan aigah Matkači-opastuskeskukses lapset pandih lavale yhtehine spektakli “Kalevalan” mugah, viizi katkelmaua sih niškoi hyö valmistettih vie omis abukeskuksis olles. Dekoratsietgi spektaklih niškoi lapset sežo luajittih iče.
