”Kalarand” jo vaumičese vastata adivoid vepsän kul’turan praznikale
Heinkun 5. päiväl Kalages, Änižen randal mäneb vepsläine praznik ”Kalarand”. Se tundištoitaba adivoid vepsläižiden tradicijoidenke, sädaikollektivoidenke, tradicionaližidenke vepsläižidenke sömidenke. Mugažo adivod voiba ostta mastariden tehmusid, ühteta mastar’-klassoihe. Penid adivoid varastab melentartuine ilotuzprogramm.
— Praznik tradicijan mödhe mäneb ”Kalarand”-etnoparkas. Tradicijan mödhe praznikan avaidab Vepsän rahvahan hor, tuleba toižed-ki pajo- da kargkollektivad Karjalaspäi. Mö jo zavodim vaumitas praznikaks, püdam kalad lemeks, miše sötta meiden adivoid. Meletan, praznik linneb melentartuižen, tob kaikile hüväd mel’t. Tulgat mijale, kackat kaik ičetoi sill’mil, starinoičeb Kalagen školan pämez’ Svetlana Gotič.
Ehtal järven randal linneb praznikan jatktand. Kaik, nored, aigvoččed, vanhad, voiba tulda kargaidamha da hüvin mänetamha aigad sebranikoidenk da läheližidenke.
