Kalagen keskškolas kerazihe vepsän kelen opendajad, miše pagišta vepsän kelen opendamižes da tärktoiš küzundoiš, jagadas mahtištol. Necil kerdal azjtegoho ühtniba ei vaiše opendajad, no openikad-ki. Openikad tundištihe vepsläižiden tradicijoidenke opetes paštmaha kalitoid. Sišpäi azjtegon nimi-ki – Töpaja ”Vepsläine kalit”.
— Muloi, konz tuliba vepsän kelen opendajad toižiš školišpäi, mö ozutim heile vepsän kelen urokoid da kut lapsed opendaba vepsän kel’t lapsiden päivkodiš. Necil kerdal mö pätim tehta sädaivastusen. Vaumičim adivoiden täht mastar’-klassan, paštoim kalitoid. Se muga tuli mel’he kaikile, eskai openikoiden vanhembad pakičiba tehta mugoižen-žo mastar’-klassan heiden täht. Nadeimoiš, miše mugoižid lämid vastusid meiden školas linneb enamba, ved’ ned oma lujas tärktad, sikš ku niil lapsed tundištasoiš vepsläižidenke veroidenka da tradicijoidenke, sanub vepsän kelen opendai, Änižröunan kodikeliden opendajiden ühtenzoitusen ohjandai Maria Mironova.
Vastusel oliba adivod Šoutjärvespäi, opendajad da openikad. Kaikutte openik lujas tarkašti kacui, kundli i iče probui tehta tahtast. Lapsed oliba täuduližed, ved’ nügüd’ hö tedaba vepsläižiden kalitoiden receptan i voiba paštta kalitoid kodiš ičeze vanhembidenke.