Parahakši kuklateatterispektakliksi nimitettih Karjalan kuklateatterin spektakli “Kalaštajašta ta kalasešta”.
Kultani nuamijo -kanšallisen teatteripalkinnon ta -festivalin voittajie ilmotettih Moskovašša. Heijän joukošša on Jana Tuminan spektakli Aleksandr Puškinin Kalaštajašta ta kalasešta -starinan mukah. Karjalan kuklateatterissa šen enši-ilta oli vuotena 2019 pimiekuun 24. päivänä.
– Tuntui, jotta puoli Petroskoita šeurasi eklein Venäjän kanšallisen teatteripalkinnon seremonijua. Še ei ole šattumalta – tämä on monen petroskoilaisen miellyttävä spektakli. “Kultasen nuamijon” on šuanun Moskovašša teatterin johtaja Ljubov’ Vasiljeva ohjuaja ta taiteilija, Piiterin KUKFO-teatterin taitojohtajan Anna Vikotorovan käsistä, kirjutti Karjalan kuklateatterin lehistöpalvelu.
Kalaštajašta ta kalasešta -spektakli ošallistu kilpailun nelläh nominatijoh. Petroskoin teatterit jo oltih “Kultasen nuamijon” palkintojen šuajina, ka tämä palkinto on enšimmäini Venäjän Kanšallini palkinto parahašta spektaklista.