Kaks’ ut ”Kuki-rikkun” vipuskad jo nägištiba ezmäižed kacujad
”Periodika”-paindištos ezitadihe uded jumoristižen žurnalan videorolikad karjalan da vepsän kelel. Projekt sündui muloi, necil vodel se sai jatktandan.
”Kuki-rikku” — nene oma lühüdad jumoristižed videorolikad lapsile da vanhembile. Artistad niiš pagižeba vepsän kelel da karjalan kelen kahtel paginal. Kaiked om jo kuvatud nel’l’ vipuskad (kaks’ vipuskad muloi da kaks’ – täl vodel), kaikuččes vipuskas om koume videorolikad.
— Kut männudel-ki vodel, lapsed oliba vastusenpidäjad. Lujas abutiba kuvadandprocessale mastar’-klassad, miččid vedi lapsiden täht ”Montes”-rahvahan teatran artist Darja Grečana. Niiden taguiči lapsed tuleskeliba sjomkoile jo vaumhed. Hot’ erašti ani sjomkoiden aigan mö vajehtim vähäižen scenarijoid. Ozutesikš, üks’ rolik Vedlozeras tariž oli kuvata irdal, no sil päiväl oli kova pakaine, sikš kuvazim lapsid pertiš, sanub sjomkoiden ohjandai Julia Potahina.
Necen voden kahthe vipuskaha ühtni 13 last. Nene oma Vedlozeran da Petroskoin erazvuiččiden školiden openikad. ”Kuki-rikku”-projekt tugedab Karjalan rahvahaližen da regionaližen politikan ministerstv. Pigai videorolikad ozutasoiš Internetas.
