Kaikenvenäman keliden olimpiad abutab päzuda universitetha
Kül’mkun 10. päiväl zavodihe Kaikenvenäman olimpiad Venäman rahvahiden kelidme da literaturadme. Täl vodel olimpiad mäneškandeb 29 Venäman rahvahiden kel’tme da literaturadhe. Olimpiad mäneb Venäman universitetoiden tugel. Nece om tradicionaline olimpiad, no joga vodenke sihe ližatas kelid. Ozutesikš, neciš vodespäi Karjalan openikad voiba kirjutada olimpiadad karjalan kelen livvin paginal-ki. Tegendoid olimpiadan täht vaumičiba Petroskoin universitetan baltianmeren suomalaižiden kafedran opendajad.
— Olimpiadan valičuzetap zavodihe 10. kül’mkud da lopiše 10. vilukud 2023. vodel. Se vedetas online-ki formatas, mi abutab openikoile tehta tegendoid ičeze elosijas, – sanui olimpiadan kurator, baltianmeren suomalaižiden keliden kafedran opendai Svetlana Korobeinikova.
Toine olimpiadan etap mäneb 2023. voden uhokus. Federaline openikoiden olimpiad Venäman rahvahiden kelidme da literaturadme mülüb Venäman openduzministerstvan openikoiden olimpiadoiden luguhu. Ühtnend olimpiadaha andab sen vägestajile ližaballoid, miččiden abul ho voiškandeba päzuda universitetha. Heil om voimuz päzuda folologijan da pedagogikan openduzaloveheze ekzamenoita. Varastadas, miše toižil vozil olimpiadan keliden luguhu ližatas karjalan kelen pohjoižpaginad da vepsän kel’t.
