Kaksi kerdua kolmes vuvves Karjalan kanzallizen poliitiekan ministerstvu pidäy käzikirjutuksien kilbu. Kilbah otetah opastuskniigoi, literatuurutevoksii, runoi, lugiettavua lapsile da muudu literatuurua karjalan, vepsän da suomen kielel.
Tänävuon ministerstvan kilbah tuli yksitostu käzikirjutustu. Voittajakse on piässyh kaheksa: Jelena Ruppijevan Karjalan kieli algajih niškoi -opastuskniigu karjalan kielen livvin murdehel, Larisa Čirkovan da Ol’ga Žukovan Sanu vepsäks -opastuskniigu vepsän kielel, Ol’ga Hramtsovan “Suomalaisten sananlaskujen ja sanontojen aakkoset” suomen kielel, Seppo Kantervon Perijuurilla-komeedii suomen kielel, Iivo Nikutjevan Marfa-pouvesti karjalan kielen vienankarjalan murdehel, L’ubov’ Kir’ušinan Vienanmeren starinoja -suarnukogomus, kudaman on kiändänyh vienankarjalakse Natalja Pellinen da Sergei Jakovlevan Ämmön šuarnat -runokogomus karjalan kielen vienankarjalan murdehel.
– Sergei Jakovlev on alottelija runoilija Louhen piirin Nisan kyläštä. Mieš alotti kirjuttua runoja viime vuuvven šykyšyllä, ka hänen nimi on jo hyvin tuttu “Oman Muan”, “Kipinän” ta “Taipalen” lukijilla. Ämmön šuarnat -kokomukšeh kuulutah kuin jo painetut, niin ni uuvvet runot vienankarjalan murtehella. Varmašti runokokomuš täyventäy ta koristau karjalankielistä kirjallisutta, sanou Oma Mua -lehten toimittai Maikki Spitsina.