Južno-Sahalinsk tegihe vähäluguižiden rahvahiden kul’turiden keskuseks

Paginištundan aigan. Etnokul’turižiden keskusiden ezitajad starinoičiba ičeze rados, jagoihe mahtištol. Kuva: Tatjana Petros’jan

Sahalinal mäni Rahvazkeskeine Pohjoižen, Sibirin i Edahaižen Päivnouzman igähižiden vähäluguižiden rahvahiden etnokul’turižiden keskusiden radon kacund. Azjtegole tuliba delegatad Jakutiaspäi, Karjalaspäi, Sahalinan pohjoižespäi, Primorskan da Habarovskan röunoišpäi, Magadanan da Sverdlovskan agjoišpäi.

Kacundan aigan mäni paginištund, kus pagištihe igähižiden vähäluguižiden rahvahiden kelen, kul’turan, tradicijoiden kaičendas da kehitoitandas. Etnokul’turižiden keskusiden ezitajad starinoičiba ičeze rados. Vepsän kul’tursebran ühtnikad jagoihe radon mahtištol ”Värtin”-etnokeskuses, mitte radab Kalages.

— Azjtogon pätegend ezmäi kaiked om igähižiden rahvahiden kosketused, mugažo ičeze kul’turan ozutand, popul’arizoitand. Mö voim tundištoitta ristituid erazvuiččiden vähäluguižiden rahvahiden kul’turanke, vajehtadas mahtištol, sanub Sahalinskan rahvahan sädandradon keskusen varapämez’ Viktor Stepanov.

Ozutelusen ühtnikad ezitiba ičeze agjan unikališt kul’turad. Kaik adivod voiba kacta mastariden käzitehmusid puspäi, kalan nahkaspäi, kaičuzkaluid, rahvahaližid sädoid, vändimid da čomitesid, eskai kundelta pajoid, miččid pajatiba sädaikollektivad, i nägištada rahvahaližid karguid.

Saren adivoiden täht azjtegon sädajad tegiba čoman ekskursijan, ozutiba kaikid čomembid sijaližid melentartuisijoid.