Igähižiden rahvahiden küzundoiš pagištihe Barencan Evro-Arktižen regionan sammital
8. kezakud vepsläižed eziniba Barencan Evro-Arktižen regionan igähižiden rahvahiden sammital. Pandemijan taguiči ühtnikoil ei olend voimust keratas ühthe, no kaik delegacijad ühtniba sammitaha internetan kal’t.
Sammitan päteman täl kerdal oliba rahvahiden kelid, niiden nügüd’laine situacii da tulii aig.
— Pidab kehitoitta da popul’arizoitta rahvahiden kelid kut regionoiš, muga keskmaižes korktudes, sanui Helene Hellmark Knutsson, Barencan Evro-Arktižen regionaližen nevondišton pämez’.
Vepsän kelen polhe nügüdläižes aigas starinoiči Natalja Silakova, kudamb ezitab vepsläižid Barencan Evro-Arktižen regionan igähižiden rahvahiden radgruppas. Vepsän kul’tursebran pämez’ Larisa Čirkova ezini dokladanke vepsän kelen tulijas aigas.
Sammit mäni jo koumanden kerdan da vepsläižiden delegacijan ištund mäni Karjalaižiden, vepsläižiden da suomalaižiden mediakeskuses.
