Gadžetoin, telefonoin sinine spektru: pidäy varata
Tiedomiehet, kudamien joukos on karjalaine tutkii, tovendettih, ku telefonoin da toizien gadžetoin liijakse käyttämine pahoi vaikuttau ristikanzan tervehyöh: häi sangenou da pahoi maguau, zuaharintazo veres nouzou da rikkovuu ainehvaihto.
Sinizen spektran suvastus enimite vaikuttau korgieloil levevysastieloil da sen lähevil eläjih.
— Sanommo, illal ristikanzu istuu telefonu käis libo tiedokoneh tyves. Istuu hätken, myöhässäh, toiči yölöil rahvas ruatah niilöin vuoh. Moizil ristikanzoil pidäy varata razvan kerdymisty, lipidumuutoksii, unen rikkomistu, sanoi Oma Mediale Biolougien instituutan geneetiekan laboratourien tiedomies Sergei Kolomeičuk.
Ildupuoles da yöl gadžetoin suvastus tukahduttau melotoninan tuotanduo — ristikanzan rungu ei ellendä, ku pidäy huogavuo, se endizelleh on valvomas. Ristikanzan mieliala pahenou, häi enämbän syöy da sangenou, hänen ainehvaihto pahenou, korgenou zuaharin tazo veres da nouzou paha holesteriinu. Sen periä voibi roita ateroskleroottistu plakkii da syväinkerän taudii.
Nämmih yhtehvedoloih tuldih Murmanskan, Siktivkaran, T’umenin da Petroskoin tiedomiehet, kuduat yhtes tutkittih tädä aihettu Svet Arktiki -projektas, kudai algavui vuvvennu 2020. Viijen vuvven aloh tiedomiehet tarkastettih loittozen pohjazen 60 eläjän tervehytty da sen muutoksii.
Yhtelläh sinizes suvastukses voibi olla hyödyygi. Sidä käytetäh lor-voimattomuksii parandajes. Germuanien tiedomiehet tovendettih, ku huondeksel sinine suvastus voibi alendua verenpainuo.
