Endevanhoiden kul’turiden ezitajad ozutaba parahimid sädandnomeroid festivalil
3.—6. sügüz’kud Piteriš da Viborgas mäneb IX Vähäluguižiden suomalaiž-ugrilaižiden da samodiiskijoiden rahvahiden sädandradon Kaikenvenäman festival’, miččen nimi om “Pohjoiždölon melodijad”. Se om omištadud Venäman rahvahiden ühtmuden vodele da Venäman rahvahiden keliden päiväle. Vepsän rahvahan hor ühtneb neche festivalihe jo toižen kerdan.
Praznik zavodihe čomal koncertal. “Mamoi Venäma”-nomer ühtenzoiti kaikid adivoid. Ühtel laval voi kulištada suren man erazvuiččiden rahvahiden änid, melodijoid da nägištada rahvahaližid sädoid. Ehtal kaikuččel sädaikollektival oli voimuz ozutada ičeze parahimid nomeroid. Oli äi pajoid da karguid.
— Ühtnend mugoižihe festivalihe andab voimusen tundištadas toižiden rahvahiden kul’turidenke, radonmahtoidenke, veroidenke, vajehtadas mahtištol, vastata vanhoid sebranikoid da sada uzid, a mugažo ozutada ičeze rahvahan henged da ičeladuližut, sanui Vepsän horan ühtnik Natalja Anhimova.
Festivalin aigan mäni konferencii, kus vähäluguižiden suomalaiž-ugrilaižiden da samodiiskijoiden rahvahiden tradicijoiden kaičijad jagoihe ičeze mahtištol da pätusil kul’turjäl’gestusen kaičendas. Mugažo adivoiden täht tehtihe tundištoituzmatk Kunstkameraha – Venäman ezmäižehe muzejaha, mitte lahjoiči heile unohomatomid tundmusid.
Festival’ mäneb Venäman kul’turministerstvan da Piterin agjan valdmehišton tugel.
Uzištoid neciš temas voib lugeda mugažo karjalaks.
Tarkištele "Oma Median" MAX-kanalad!
