Delfin da Rusalka Nuožarven rannas
Nuožarven kuulužu puuvestäi Aleksandr Voglojev jatkau čomendamah Nuožarven rannikkuo. Tänäpäi huondeksel järvirandah puututtih Del’fin da Rusalka.
– Mustattogo, minä sanoin, ku Aleksandr Voglojev vie kummastuttau meidy… Tänäpäi häi da hänen abuniekat Sergei Savinets da Nikolai Kirillov azetettih Nuožarven järven randah uvvet puuvestokset… Passibo, armas meijän Aleksandr, olet tozi tiedoiniekku! Passibo sinun Jelena-mučoile, ku häi kannattau sinun luomisruaduo, ku annau vallan joudaval aigua ruat Nuožarven kylän hyväkse, ku luajit meijän kyliä čomembakse, kirjutti omal Vk-sivul Nuožarven kyläkunnan piälikkö L’ubov’ Ponomar’ova.
Nuožarven järven randu on jo täyzi Aleksandr Voglojevan luajittuu vestostu: niilöin keskes on äijy suarnallistu hengie.
