Belomorsku: partizuanuliikkehen muzein avuandu
Belomorskan piirin eläjienke vastavujes partizuanuliikkehen muzein avuandas ilmoitti Karjalan tazavallan piämies Artur Parfenčikov. Ižänmuallizen voinan aigah Belomorskas oli Karjalan frontan partizuanuliikkehen tazavallan štuabu. Se oli sijoitettu Okt’abr’skoi-uuličal kois noumeru 26. Tiä valmistettih partizuanujoukkoloi, kudamil oli suuri panos nemsoin da suomelazien voiskien perguamizes. Heijän rohkevuol oli hävitetty vihaniekoin 50 garnizounua, enämbi 70 evähien da bojuvehkehien skluaduu, äijy vihaniekoin saldattua da tehniekkiä.
Artur Parfenčikov Belomorskan piirin eläjien kel vastavujes sellitti, ku partizuanuliikkehen histourielline rakendus da ”Karjalan frontan muzei” ruvetah ruadamah yhtes. Tulien yhtistetyn muzein tilois roihes pihaekspozitsii.
— Kačommo, kui olis ehättiä partizuanuliikkehen rakendus lähembä Karjalan frontan muzeidu, lövvämmö sijua. On vie moine idei, luadie muakuopat, sanoi Artur Parfenčikov omassah lehtistöpalvelule.
Karjalan tazavallan piämiehen sanoin mugah, se rodieu ylen mieldykiinittäi muodo, kudai miellyttäy nuorii da turistoi.
Mustoitammo, ku Karjalan frontan muzei otti vastah enzimäzii käyjii syvyskuun 30.päivänny vuvvennu 2020 Karjalan vihaniekois piäständän päivänny. Muzein luadimine sai kannatustu Ven’an Prezidentan Vladimir Putinan puoles.
Aihies voit lugie suomeksegi.
