Balagurovin luvennot -konferenšši piettih online Belomorskissa
Belomorskissa Pomorien kulttuurikeškukšešša piettih perintehellini jokavuotini Balagurovin luvennot -konferenšši. Tänä vuotena šen ošanottajat esiinnyttih online. Konferenššie piettih Karjalan tašavallan kanšallisen ta alovehellisen politiikan ministerijön kannatukšella.
– IX Balagurovin muissolla omissettuh konferenšših ošallistu 22 ihmistä Belomorskin alovehelta, Petroskoista, Kontupohjašta, Koštamukšešta, Kemistä, Murmanskin alovehelta. Heijän šeloššukšet oli omissettu Belomorskin piirin šekä koko Karjalan istorijalla, ta ne julkaissah Balagurovin luvennot -kokomukšešša enši vuotena, kerto Pomorien kulttuurikeškukšen metodisti Snežana Gorina.
Konferenššin kaikki ošanottajat: istorikot, kotišeutututkijat, filologit, koululaiset, opaštujat, oman šeuvun tutkijat etukäteh lähetettih omien šeloššukšien tesissat. Ne julkaistih eklein Pomorien keškukšen nettisivulla ta nyt joka halukaš voit lukie niitä.
Konferenššie pietäh Belomorskissa 2012 vuuvvešta alkuan. Še on omissettu Šujujärven kyläššä šyntynyön tunnetun istrorikon, tietomiehen, professorin, yhteiskunnalisen tekijän Jakov Balagurovin muissolla. Jakov Aleksejevič tutki Belomorskin piirin ta Karjalan istorijua.
