Associacijan pätegend – kaita vähäluguižiden rahvahiden kodikelid
Piteriš mäni III konferencii ”Pohjoižen, Sibirin da Edahaižen Päivnouzman igähižiden vähäluguižiden rahvahiden kodikeliden, fol’kloran, literaturan da kul’turan kaičend globalizacijan aigan. Sihe ühtni läz 50 mest Jakutiaspäi, Jugraspäi, Karjalaspäi, Kamčatkan da Habarovskan agjoišpäi, mugažo Moskvaspäi da Piterišpäi.
Konferencijan avaiži Venäman Pohjoižen, Sibirin da Edahaižen Päivnouzman igähižiden vähäluguižiden rahvahiden associacijan prezident Grigorii Ledkov.
— Kodikeliden tundijad, opendajad, ekspertad i kaik, ked omištaba elod kodikeliden oppindaha, voiba nadeidas Kaikenvenäman Associacijan tugele. Küzundad, miččed koskeba kodikeliden kaičendad da kehitoitandad, meiden täht kaiken oma tarbhaižed, sanui Associacijan prezident.
Konferencijan aigan radoiba paginištundad, kus pagištihe vähäluguižiden rahvahiden kodikeliden, fol’kloran, kul’turan, literaturan kaičendas da kehitoitandas. Ühtnikad vajehtihe ičeze radonmahtoil, jagoihe praktikoil, kut voib mel’dütoitta lapsid da norid kodikeliden opedamižehe nügüdläižes aigas.
Vepsän kul’tursebran ühtnik, kirjutai Natalja Silakova starinoiči vepsänkeližen literaturan problemoiš.
— Ei ole literaturad keleta, kirjutajile pidab tarkašti pidetas kel’he. Tämbei om vähä ristituid, ked tedaba kel’t i kel om lahjavuz’ kirjutamižehe. Ei kaikutte, ken mahtab pagišta kelel, voib kirjutada prozad vai runoid kodikelel. Sikš arvosteldes tämbei literaturad vepsän kelel, ei sa jätta homaičemata nügüdläišt vepsän kelen statjad, sanui Natalja.
Hänen melen mödhe professionaline metod literaturan tegemižehe abutab kirjutesiden kal’t kaita da antta toižile sugupol’vile ei vaiše kodikel’t, no rahvahan kul’turad da tradicijoid.
