”Anuksenlinnan karjalazet”: uuzi projektu
Anuksenlinnan karjalazet -liitto on suannuh kannatustu Prezidentan grantufondas uvven Oniegas Luadogah suate -projektan todevuttamizeh.
Se on tarkoitettu nuorile, školis opastujile. Karjalan tazavallas on enämbi 72 000 školaniekkua. Lähes kolmas vuitti niilöis opastuu 4.—7. kluasois. Projektua valmistajes liittolazet piettih kyzely 10—13-vuodehizien lapsien keskes da tiijustettih, midä hyö tietäh Karjalan histourieh da kul’tuurah nähte. Kyzelyh yhtyi Petroskoin kuvven školan 249 opastujua.
— Kyzelyn tulokset da kyzymyksih suavut vastavukseh ollah hämmästyttäjät: kyzeltävis lapsis 73 % kyzymykseh ”mindäh Karjalan tazavallal on moine nimi”, vastattih ”en tiijä”. Kyzymykseh ”ket ollah karjalazet” vastattih vaigu 7 % lapsis, hyö kirjutettih, ku karjalazet ollah tazavallan kandurahvas. Kaikis hämmästyttävin oli vastavus, ku ”karjalazet ollah kalat”, sanoi Oma Mediale projektan piälikkö Larisa Utkina.
Projektu ”Oniegas Luadogah suate” algavuu tuliel kuul. Syvyskuus sih yhtyy Petroskoin kolme školua da yksin školin Sordavalan, Pitkänrannan, Priäžän da Anuksen piirilöis.
Projektan lopus rodieu pietty aivokiža.
— Tahtozimmo, ku Petroskoile kilbailemah tuldas lapsijoukot jogahizes školas, kuduat yhtytäh projektah, ližäi Larisa Utkina.
Projektan pidoloih yhtyy piäl 120 lastu. Heih niškoi pietäh ruadopajoi, sanellah rahvahallizih ruuttih, perindöllizih soittimih, pajoloih, suarnoih da nygyaigazeh literatuurah nähte. Joga pivos lapset kuultah karjalankielisty paginua, tuttavutah taidojoukkoloih, kuduat kehitetäh karjalastu kul’tuurua.
Aihies voit lugie suomeksegi.
