Tänä vuotena Karjalan piämiehen rinnalla toimija šanaštokomiisi täyttäy 25 vuotta. Merkkivuuvvella oli omissettu pyörie stola, kumpasešša komiisin jäšenet kerrottih šen istorijašta ta merkittävimmistä ruavon tulokšista šekä mi nyt on komiisin tehtävinä.
— Šanaštokomiisi luati tovellah šuuri panoš kielen kehittämiseh ta nytki šen jäšenien ruato on hinnatoin arvokaš ta merkittävä. 25 vuuvvešša oli ruattu äijän, ka meitä vielä vuotetah šuuret tehtävät tulovaisuošša, šano Karjalan kanšallisen ta alovehellisen politiikan ministerijön spesialisti, šanaštokomiisin puhienjohtaja Jelena Migunova.
Šanaštokomiisih kuulutah tietomiehet, Periodika-kuštantamon ta Karjalan TV-yhtyvehen spesialistit. Neuvotteluelimen jäšenet ollah kirjojen ta šanakirjojen luatijat, toimittajat ta valmistajat, hyö esiinnytäh eksperttiloina yhteisruavošša toisien virallisien järještöjen, ministerijöjen, hallintojen, laitokšien kera, ratkaissah šanašto- ta kielioppikyšymykšie.
Pyörien stolan avajaisissa šanaštokomiisin jäšenillä myönnettih kiitoš- ta kunnivokirjoja.
Pyörien stolan järještäjä, šanaštokomiisin puhienjohtaja Jelena Migunova korošti, jotta tapahtuma tuli oikein mukavakši ta ehotti valmistua šeloššukšien šähkökokomuš.