Mie toivon myöštyö
Oraškuun 13. päivänä Karjalan Kanšallisešša musejošša esitettih kirja “Anatolii Martinov. Mie toivon myöštyö”. Še kertou tunnetušta karjalaisešta liäkäristä, tietomieheštä, opaštajašta ta runoilijašta Anatolii Martinovista.
Tilaisuoh otettih ošua Karjalan tašavallan lakienluajintakokoukšen deputatit Emilija Slabunova ta Leonid Liminčuk, Petroskoin yliopiston etuštajat, Anatolii Martinovin opaštujat, yštävät, työkaverit, potilahat, lehtimiehet.
– Muissan Anatolii Martinovie mainivona liäkärinä, viisahana opaštajana, omua muata rakaštajana, hyvänä ta kirkkahana ihmisenä. Kirjan ideja šynty vuotena 2016, konša karjalaini tietomieš Viktor Jeršov mainičči, jotta Anatolii Anatoljevičin henkilö pitäy ikuistua kirjašša. Mie rupesin ruatamah. Kirjan luatimiseh mäni kolme vuotta. Še oli vaikie työ, vet miula ei ollun tietoja paičči Anatolii Martinovin omie muisselmie. A miula oli luajempi tehtävä. Halusin ei ainuoštah kertuo hänen šotalapšuošta, nuoruošta, opaššukšešta ta ruavošta Karjalašša, vain kertuo mimmosena ihmisenä hiän oli, kertou Valentina Sukotova.
Valentina Aleksandrovna löysi Anatolii Martinovin yštävie, työkaverija, opaštujie, luokkatoverija Venäjän kymmeneštä kaupunkista ta äšen Australijašta. Hyö kaikin otettih ošua kirjan luatimiseh. Heijän kertomukšet autettih avata nerokkahan liäkärin personallisutta.
Kirjua täyvennetäh audio- ta DVD -levyt.
– Myö halusima, jotta lukija näkis Anatolii Martinovin, kuulis hänen ajatukšie muan kohtalošta ta liäkärin ammatin peruštehista, jatkau kirjan luatija.
Esittelyššä Valentina Sukotova ta kirjan toimittaja Svetlana Berdova luvettih katkelmie kirjašta ta Anatolii Martinovin runoja šekä näytettih valokuvie ta videoita.
Kirjan voit šuaha Karjalan tašavallan kanšalliskirjaštošta tahi kiäntyön luatijan puoleh.
Anatolii Martinov šynty vuotena 1937 Vladimirin alovehen Kovrovin kaupunkissa. Vuotena 1962 hiän lopetti Jaroslavlin liäketiijollisen instituutin, min jälkeh tuli ruatamah Petroskoih. Anatolii Martinov ruato terapeftina, kardiologina, reumatologina ta opaštajana. Ruatovuosien aikana liäkäri šai äijän palkintoja ta kiitoškirjasie. Anatolii Martinov on liäketiijollisien töijen ta runokokoelmien luatija. Hiän šiirty tuonilmasih vuotena 2016.
