Karjalan valdkundas jatkab rata federaline ”Zemskii feršal”-programm. Necil vodel planuitas kucta 44 lekarid. Voden augotišespäi 12 mest jo zavodi rata, äjad heišpäi tuliba Karjalaha toižiš Venäman agjoišpäi. Kaiked 2012. vodespäi, konz zavodi rata programm, radole Karjalaha om tulnu enamb 200 mest.
Muga, 2020. voden vilukuspäi ”Zemskii feršal”-programman abul Kalagehe tuli radmaha feršal L’udmila Anatoljevna Semukova. Hän eläb susedküläs Šoutjärves, mugavudud fateras, mitte osttihe programman abul. Kaikuččen päivän hän ajeleb radole Kalagehe. Eläjad Kalagespäi, Toižegespäi da Kaskezaspäi tuleba hänennoks samha tervehtaiabud.
— Kaks’kümne viž vot omištin tervhuz’tedole. Radoin FAP-an ohjandajan Oloncan rajonas. Kaks’ vot olin pensijal. Jäl’ges pätin jatkata ičeze azjad, tahtoin ližata radmahtod, abutada ristituile küläs. Rad om mel’he, täs eläba lujas hüvänsüdäimeližed ristitud, sanub Kalagen FAP-an feršal L’udmila Semukova.
Feršal, kudamb tuleb radmaha külähä ”Zemskii feršal”-programman mödhe, sab raha-abud valdkundaspäi, no hänele pidab rata viž vot.