Zavodihe vepsän kelen nedal’
Vepsän kelen nedalin azjtegod om omištadud vepsän kirjkelele, literaturale, opendusele da kul’turale. Sen nedalin päohjandai om Karjalaižiden, vepsläižiden da suomalaižiden resurskeskus.
Kogonaižen nedalin Karjalas vedetas erazvuiččid azjtegoid, konkursoid, mastar’-klassoid da lekcijoid vepsän kelen da vepsläižiden polhe.
—Vepsän kelen nedalin aigan Resurskeskuses mäneba avaitud tedomehiden da kel’aktivistoiden lekcijad: Maria Šašina mänetab kel’vastusen ”Kut sanuda necidä vepsäks?”, Natalja Čikina starinoičeb vepsän literaturan polhe, a tedodoktor Irina Vinokurova – vepsläižiden mifologijan polhe, sanub Alina Kartinen, resurskeskusen radnik.
Nedalin azjtegod mäneba ei vaiše Resurskeskuses, no Petroskoin universitetas, Rahvahaližes kirjištos, Taidehmuzejas, školiš ei vaiše Petroskoiš, no vepsläižiden tradicionaližiš elotahoiš-ki.
Nedalin programmanke voib tundištadas Karjalaižiden, vepsläižiden da suomalaižiden resurskeskusen VKontakte-gruppas.
Azjtegod mäneba eri-igäižiden ristituiden täht.
