Yheksäs ”Kalitka” on pietty, valmistumas on kymmenes
Yheksäs Kalitka-festivuali oli pietty 15.—16. elokuudu Lihoslavl’an piirin M’ammino-etnokompleksas. Pidoh yhtyi lähes 10 000 hengie, niilöin keskes oli meigälästygi rahvastu.
Mennyt vuon kanzoinvälizen Russian Event Awards -palkindon gran-prin suannuh festivuali tänävuon tovendi pivon korgiedu luaduu. Sidä tarkastamah tuldih turizmualan ekspertat Gennadii Šatalov, Ol’ga Hotočkina, Igor’ L’utenko, Boris Lipatov. Heijän piän al 15. elokuudu oli pietty istundo, kuduas šeikuittih paikallizien alovehien kehittämisty turizman avul. Pidoh yhtyttih Karjalan tazavallan Kanzallizen da alovehellizen poliitiekan ministru Sergei Kisel’ov, Anuksen kanzallizen piirin piälikkö Vadim Murii, Valgoven’al, Udmurties, Voulogdan alovehelpäi tulluot spetsialistat.
Festivualin aigah neroniekat tarittih omii käziluajilmuksii, muuzikkujoukot ozutettih omua pajo- da tansineruo. Paikallizien da tulolazien artistoin keskes sai nähtä da kuulta Anuksen piirin lapsii, Veškelyksen kylän ”Revinnytty kottua”, petroskoilastu Čičiliušku-teatrua. Vuokkiniemen emändät ozutettih, kui Karjalas pastetah šipainiekkua.
Pivos piettih ruadopajoi da kilboi, kižattih kriukkah, vallittih paras näppipiirai. Jogaine, ken tahtoi, sai omin käzin luadie saviast’e libo magei karamelli-n’amu, opastuo setämä sana karjalakse.
Periodika-julguamo sežo yhtyi Kalitka-festivualih.
— Olemmo jo olluh festivualis mulloi da ennemullostu. Moizis pidolois on hyödyy da kogemustu. Tälgi kerdua meijän kirjoi, lehtii, žurnualoi kačottih da ostettih, sanoi Periodikan piälikkö Jevgenija Šustova.
Tulien vuon kymmenes ”Kalitka” pietäh 14.—15. elokuudu. Periodika-julguamuogi sinne vuotetah rakkahal.
Aihies voit lugie ven'aksegi.
