Sortavalan piirin Kurkijoki on valittu yhekši piäkentöistä, missä vuotena 2027 ruvetah juhlimah Karjalaisien kaštamisen 800-vuotispäivyä. Viijen vuuvven aikana pos’olkašša šuunnitellah korjata kotišeutu- ta kulttuuri-šivissyškeškukšen rakennukšet. Šamoin Kurkijovešša luajitah instal’l’atijo – kallivočärkän huipuilla kunnoššetah signalitulien sistemi, mitä käytettih keškiaikoina.
Työmatan aikana Karjalan tašavallan piämieš yheššä Kulttuuriministerijön spesialistien kera tarkašti näitä objektija. Vuoteh 2027 uuvvissetah ni iče Kurkijoven pos’olka, missä järješšetäh šuurie kunnoštamistöitä.
– Kurkijokie pitäy kehittyä, šentäh kun viijen vuuvven piäštä še tulou Karjalaisien kaštamisen 800-vuotispäivän juhlimisen yhekši keškukšista. Meijän tarkotukšena on kuin kunnoštua istorijallisie objektija, niin ni luatie äijän muita töitä, jotta pos’olkašša tulis parempi elyä – korjata teitä ta infrastruktuurie. Še on Presidentin käšyn toteuttamisen tärkie oša, korošti piämieš Artur Parfenčikov.
Venäjän Federatijon presidentti Vladimir Putin allakirjutti käšyn Karjalaisien kaštamisen 800-vuotispäivän juhlimisešta vuotena 2027. Juhlaohjelman piätapahtumat pietäh Karjalan tašavallan alovehella. Pruasniekan rajoissa Karjalašša rakennetah uušie henkellis- ta šivissyškeškukšie, restauroijah kulttuuriperinnön objektija, toteutetah kuštannušprojektija šekä pietäh šivissyštoimenpitoja.