Vojačun školainternuatas kehittyy lapsien teatru
Karjalas on loppiettu vie eräs skolaniekoin projektu. Vojačun školainternuatas n:u 14 algoi ruavon Osobije talanti -teatru.
Škola voitti opastuslaitoksien algupanoloin kilvas da osti teatrah niškoi kost’umat, dekoratsiet, muuzikkusoittimet, sähkö- da kuvavuslaittehet. Kai se auttau lapsile oman teatran kehittämizes.
— Projektan auttajat da nevvojat kerrotah, ku heijän kazvattiloin mieli jo ammui palau teatrah, sendäh ei pidänyh hätkie vallita projektua, kuduan kel yhtyö opastuslaitoksien alguhpanoloin kilbah. Yhtes opastajien kel nuoret artistat tahtotah kehittyö kerras kolmeh suundah: klassiilline teatru, muuzikkuteatru da kuvahazien teatru, ilmoittau Karjalan piämiehen lehtistöpalvelu omassah tiedottehes.
Teatrujoukol ollah suuret pluanat: vähimite kolme ozutelmua vuvves, segalazien teatrujoukkoloin muodostamine, kuduah ruvetah kuulumah lapset eri mahtoloin kel, yhtehizet ruado-pajat toizien školien teatrukerholoin kel. Paiči sidä lapset uneksitah kogo Ven’an teatrukilboih yhtyndiä.
Lapsien opastajat da kazvattajat ollah varmat, ku voitto kilvas andau školale mahton olla ei vaigu opastuslaitoksennu, ga kehityksen keskusennu, kuduas kannatetah erinomastu huoldu tarvittavii lapsii.
Opastuslaitoksien alguhpanoloin kilbua piettih Karjalas tänä vuon enzimästy kerdua Karjalan piämiehen käskys. Jogahine projektu voibi suaha 500 tuhanden rubl’ua suate. Projektah yhtyndän tärgevin ehto on se, ku sil pidäy kannattua lapsien mielii da tarbehii.
Yhty Oman Median Telegram-kanalah!
