Oraskuun 24. päivänny pienet urhoit iče tuldih abuh ruavahale.
Vieljärven kyläs, kuvven čuasun mail sevoittarekset, seiččemenden kluasan opastui Timofei Kirillov da yheksänden kluasan opastui Dmitrii Suhinin, astuttih omah kodih päi Sovetskaja-pihua myöte. Karjalan Kielen Koin rinnal lapset kuultih kenentahto iändy: “Avvutakkua! Pellastakkua!”. Brihat nähtih veneh järvel da uppoju mies, kudai kučuigi abuh. Se oli brihoin susiedu, Suuren Ižänmuallizen voinan veteruanu, Ivan Nikolajevič Trifonov. Mies pakui omas vehehespäi vedeh. Ylen ruttoh brihat smeknittih, midä pidäy luadie. Timofei, kuduan kodi on Karjalan Kielen Koin lähäl, juoksi kodih ottamah airoloi. Dima juoksi stadionan kauti rannale, kus oli uppuomas heijän susiedu. Brihat ylen terväh piästih Ivan Nikolajevičalluo. Lähäl järvirannas kalasti Mihail Jolin, kudai avvutti brihoile nostua Ivan Nikolajevičan veneheh.
Palkičustseremounieh kerdyi školan opastajii, opastujien vahnembii da toizii gostii. Ven’an senuatoru Aleksandr Rakitin palkičči nuoret urhoit Federatsien Nevvoston medalil “Rohkevuos”. Aleksandr Vasiljevič hyvitteli brihoi da kiitti heijän vahnembii lapsien oigies kazvatandas. Ven’an Hädätilaministerstvan Karjalan ozaston piälikön sijahine Aleksandr Ovčinnikov sežo kiitti brihoi da heijän vahnembii da oijendi urholoile medatit “Vezil uppojien pellastamizes”.
Vieljärven kyläkunnan administratsien piämies Aleksandr Čugai kiändyi brihoin vahnembien da Vieljärven školan opastujien puoleh kiitändysanoil.
– Olemmo ylbiet, ku meijän lapset ei jätetty ristikanzua hädäh. Kunnivuo vahnembile kazvattamizes, sanoi aleksandr Georgijevič.