Al’manahan päkirjutez om omištadud ”Periodika”-paindišton jubilejale. Mugažo al’manahan lehtpolil voib lugeda prozad, runoid, starinoid ristituiden polhe, tedokirjutesen vepsläižiden puhegiš, sarnoid da lühüdoid runoid lapsiden täht. Al’manahad čomitaba pirdatused starinoihe da mujukahad fotokuvad, miččed starinoičeba matkoiš vepsläižidme külidme.
— Al’manahas om keratud kaikid tärktembid azjtegoid, miččed oliba necil vodel. Meil oma lujas hüväd avtorad, kudambad hüviš meliš kirjutaba meile. I eskai venäkeližed avtorad, kut Oleg Mošnikov, kaiken oma vaumhed abutada meile. Oleg kändab meiden runoid venän kel’he, mö kändam hänen runoid da starinoid vepsäks. Nece om lujas hüvä ühthižtö. Vepsläižiden mirule ei tarbiž olda peitos, se pidab avaita toižile. A avaita mö voim sidä vaiše kändmižiden abul, sanub al’manahan toimitai Nina Zaiceva.
Al’manahan koren tegi vepsläine pardai Aleksei Maksimov. Uz’ nomer om lujas čoma da melenatruine. Al’manah voib ostta ”Periodika”-paindištos, sen arv om 130 rubl’ad.