Veres “Taival” sanelou karjalazes perehes
On piässyh ilmah Taival-almanakan veres noumeru. Vuozi 2024 on sanottu Ven’al Perehen vuvvekse. Tämän merkikse “Taibalehen” piätiemakse rodih karjalaine pereh.
Materjualat karjalazeh pereheh nähte verekseh almanakkah valmistettih karjalan kielen, karjalazien perindölöin da eloksentavoin tiedäi Valentina Karakina, Ven’an Tiedoakadeemien Karjalan tiedokeskuksen Kielen, literatuuran da histourien instituutan ruadajat, folklouran tutkii Valentina Mironova da etnolougien tutkii Julija Litvin.
— Pereh-tiemah kuulutah perehen rakendeh, naindu da kozičendu, välit sugulazien keskes, lapsen roindu, pajoperindö, rahvahan viizahuttu — vahnoi sanondoi da sanapolviloi pereheh näh, Oma Mua -lehten piätoimittai Ol’ga Smotrova sanou.
Almanakas voibi lugie novelloigi. Niidy on kolme: Natalja Sinitskajan “Aum”, L’ubov’ Baltazaran “Neiskellozet”, Ol’ga Smotrovan “Kolme garbalovarbastu”.
— Taival-almanakan toimittajien joukon puoles toivotan teile hyvii luvenduhetkilöi, Smotrova sanou.
