Voden lopus tehtihe ühthevedoid da johtutadihe kaikid znamasižid aigtegoid kul’turan alovehes. Korktoid pauklahjoid sures panendas Karjalan valdkundan kul’turan kehitoitandaha saiba tetabad ristitud taidehen, literaturan, muzikan, kul’turan alivehiš.
Vodespäi 2021 om sädud jogavozne Karjalan pämehen literaturan rahalahj Gavriil Romanovič Deržavinan nimel. Se anttas parahimile runoilijoile da kirjutajile. Täl vodel necen rahalahjan saiba nel’l’ laureatad, niiden keskes vepsläine runoilii da kirjutai Oleg Mošnikov. Hän sai korktan pauklahjan ”Листья на ветру”-kirjas (6+).
— Nece om minun ezmäine korged pauklahj minun sädairados. Olen ihastusiš, miše sidä muga korktas arvostadihe. ”Листья на ветру”-runokirj om lujas znamasine minun täht. Nece om äjiden voziden satuz, sanui Oleg Mošnikov.
Pidädes kitändsanoid Deržavinan rahalahjan laureatad lugiba ičeze runoid kundlijoile, a mugažo homaičiba, mitte tärged rol’ om ”Север”-kulehtesel Venäman literaturan kehitoituses.