”Vepsän vezad”- sebral om uz’ pämez’
Voden augotišespäi ”Vepsän vezad”- sebran pämeheks tuli Tatjana Martjanova, Petroskoin universitetan üläopenik. Uhokus Rahvahiden sebruden kodiš mäni ”Vepsän vezad”-sebran vastuz, kus Tatjana Martjanova, starinoiči sebran holiš da planoiš tulijaks aigaks.
— Minä tahtoižin abutada kaita da kehitoitta vepsän kel’t da rahvahan kul’turad. ”Vepsän vezad” andab necen voimusen. Mö planuičem tehta azjtegoid norišton täht da rata toižiden sebroidenke, sanub Tatjana Martjanova.
Völ vastusen aigan norišton sebran ühtnikad vändiba udhe ”100 sanad Karjalas”-stolvändoho, mitte ei muga amu om pästtud eloho ”Periodika”-paindištos.
— Nece om hüvä vänd, konz tö vasttatoiš sebranikoidenke vai heimolaižidenke. Se toi meile ilod da äi hüvid melid, sanub Jelizaveta Makarova, ”Vepsän vezad”-sebran ühtnik.
”Vepsän vezad” om vepsän norišton sebr, mitte oli tehtud vodel 2003. Se ühtenzoitab norid mehid, kudambad holduba vepsän rahvahan tulijas aigas.
