Karjalan rahvahiden sebruden pertiš avaižihe Venäman rahvahan mastarin L’udmila Ivanovan ozuteluz ”Ojatin keramik”. L’udmila Andrejevna om Piterin agjan Al’ohovščina-küläspäi. Hän ei vaiše udessündutab endevanhoid vepsläižid tradicijoid, no andab niid norele sugupol’vele. Hän opendab lapsid radmaha savenke, tehmaha savesižid bobaižid, erazvuiččid kompozicijoid.
— Kaikuččen rahvahan bobaižel om ičeze erigoičusid, se om tetab kaikes mirus. Sikš meiden-ki bobaine om erine, se nikonz ei pirttud. Mugažo Ojatin keramikan erigoičuz om siš, miše sen südäimes om tühjuz’, sikš tehmaha savesižid bobaižid om jüged, sihe pidab opetas, sanub L’udmila Ivanova.
Ozutelusel om ezitadud radod, miččid oma tehnuded lapsed L’udmila Ivanovan ohjandusel. Süžetad om ottud ”Virantanaz”-eposaspäi.
— Sikš ku nece om Vepsän kul’turan voz’, nece ozuteluz om omištadud vepsän kul’turale, se starinoičeb vepsän rahvahan tradicijoiš da veroiš, ližazi L’udmila Andrejevna.
Ojatin keramik om tradicionaline Piterin agjan vepsläižiden salištuz. Miše tehta savesižid astjoid, vihelkoid, bobaižid, kävutadas saved, mittušt sadas Ojatin randoil.
Ozutelusehe ühtniba openikad Suomaliž-ugrilaižes školaspäi. Heiden täht vepsläine taidehpirdai Natalja Timina vaumiči melentartuižen mastar’-klassan. Tarkašti siš voib lugeda täs.
Ojatin keramikan ozuteluz radaškandeb necen voden lophusai.