Vepsän kul’tursebran ühtnikad tegiba literaturvastusen Čalna-küläs
Vepsän kul’tursebran ”Kel’ – minun Kodima”-projektan aigan Čalnas mäni literaturvastuz, miččen ühtnikoin oliba školan openikad. Hö tundištihe vepsän rahvahanke, sen tradicijoidenke da literaturanke.
Präžan agjan Čalna-küläs “Tuomi”-etnokeskuses mäni vastuz Vepsän kul’tursebran ühtnikoidenke. Sille tuliba sijaližen školan 4.klassan openikad ičeze opendajanke. Vändformas lapsed tundištihe Karjalan igähižen rahvahanke – vepsläižidenke, heiden tradicijoidenke, elonke, londusen hengidenke da radoidenke.
Vastusen aigan lapsed kacuiba videorolikan vepsläižes Kaskez-küläs da sen eläjiš, kulištiba eläbad vepsän paginad i tundištihe vepsläižen literaturanke. Päadivon vastusel oli vepsläine kirjutai Natalja Silakova. Hän starinoiči lapsile ičeze ”Nel’l’ dölod”-kirjas, sen pähengiš da min polhe oma sarnad.
— Meiden etnokeskuses vasttasoiš sijaližed mastarid-naižed, tegeba midä-se käzil. Mugažo paksus tuleskeleba pened lapsed. Mö tegem heiden täht erazvuiččid melentartuižid openduzčasuid, heile om mel’he sada uzid tedoid da opetas tehmaha midä-se ičeze käzil, sanub etnokeskusen pämez’ Natalja Fomina.
Mugoižed literaturvastused tehtas toižiš-ki küliš. Ned vahvištoitaba kožmust rahvahiden keskes, kudambad eläba Karjalas.
